Notanterahina tao amin’ny Kaominina Sabotsy Ambohitr’omby, ny sabotsy 06 Jona 2026, ny fanentanana momba ny fampiasana zezika biolojika, izay notarihin-dRamatoa Tafita.
Nandritra izany dia nohazavaina tamin’ireo mpandray anjara ny tombontsoa azo avy amin’ny zezika biolojika, indrindra amin’ny fanatsarana ny kalitaon’ny tany, ny fampitomboana ny vokatra ary ny fiarovana ny tontolo iainana. Nampahafantarina ihany koa ny fomba fanamboarana sy fampiasana azy araka ny tokony ho izy.
Nahaliana ny mponina ity fanentanana ity, ary vehivavy maro no tonga nanatrika sy nandray anjara mavitrika tamin’ny fifanakalozan-kevitra. Maro tamin’izy ireo no naneho fahavononana hampihatra ireo fahalalana azony amin’ny asa fambolena ataony.
Ity hetsika ity dia tafiditra ao anatin’ny ezaka ataon’ny FARM hanohanana ny vehivavy eny ambanivohitra, hampiroborobo ny fambolena maharitra ary hampihenana ny fampiasana akora simika mety hanimba ny tany sy ny fahasalaman’ny mponina.
